Rossboller

Rossboller.
Begleiter meiner Kindheit

In unnere Schdraß war en Haufe Betrieb, da war´n Speditone un der Kohlehof dernäwe, di Bahn war a nid weid, i meen en Güterbahnhof un di Aumühl mid ihrerRambe, un di ganze Holzhandlunge un Säächewärke, die Baugschäfde un Lumbesammler.  Un alle ham zu ihrere Ärwerd Zeuch transbordier müß, en Haufe Zeuch. Es had nadürlia scho Lastautos gäwe, glei gechenüwer vo uns en Neeser odder drauße en Kleider un dawar a der Gumbrächd mid seinere grosse Wärgschdadd. Awer es mäßte is mid Fuhrwärkerrumgezöschd worn. Un so e Fuhrwärk had ken Modor ghadd, sondern en, mästns awer zwää Gäul. Deswääche warn in denne Häuser bei uns rum viel Fuhrläud gewohnd. Un uff derSchdraß ware nachts di Fuhrwääche gstanne, di Blaane zugegnöbfd un di Deixl hochgstelld un e Lämbele ham se draghengd, dass kenner druff rumbld. Un bein Schmitt, des war der Grombühler Ruschkewitz, da had´s a alles gäwe, was e Fuhrmann so brauchd:Kabbe un Kiddl, Schürzer un Hose, Geisl un Pfätzschnur, Hendschi un Schdiefl, Pfeufli un Briem.
In der Gudnbärchschdraß bein Schmied, da ham di Gäul immer ihr neue Schuh aagemässe griechd. Da hammer ofd zugeguggd, a wenn des fürchderlich gschdunke had, wenn des heiße Eise uff di Schuhsohle gebrennt worn is. Des war enne vo der eindruggvollste Geruchsorgie mid denne unner Dasein zwische Grombühlstraß un Quellebach so reich gsächnd war.  Awer no wichticher war´n nadürli di Gäul. Näwe uns war di Spedition Burger.  Die ham hinne in Hof en Stall ghadd. Mir ham vo owe nunner nein Hof gugg könn.  Bis nuff nein dridde Schdogg hammer ghörd, wenn se gfüdderd worn sin, wenn se en Hawer zwische ihrer Zähn gemahle ham, wie di Kedde gerassld ham un wenn se hinne naus trompet ham.  In aller Härrgottsfrüh hammer ghört, wenn se rausgführt un eigschbannt worn sin, wie ihr
Hufeise uffn Pflaster geklapperd ham un es Zaumzeuch bein aaschbanne. Nacherd is der Woilach hinnern Sitz verschdaud worn un der Hawersagg un di Holzgribbe dezu.  Dann hads losgeh könn.
Die Gäul sin vegedarisch ernährd worn un deswääche warn des a ganz schönne Borzione, wo die verdrüggd ham. Un a endschbrächnd groß war a der Haufe Abfäll, wo nid verdaud worn is un in handliche Boller gformd nach ere gewisse Zeid widder es Lichd der Wäld derbliggd ham. Viel devo is uff ihrm Wääch durch Grombühl verdeild worn. Un wal durch unner Grombühlschdraß scho damals der mäste Verkehr geloffe is, wenichstns där mit der Gäul, war a unner Schdraß richtich gseechnd mit denne schönne Roßboller.
Die Straßekehrer ham da nid viel Ärwert mid ghatt, walls genuch Leud gäwe had, diewo en Garde ghadd ham un es mäste is no brühwarm eigsammld ham. Der Kuchemäster, derwo vore an Krankehaus gewohnd war un en Garde drüwe näwe der Baywa ghadd had, där had zegar e extra Wäächele ghadd un des häd er alle Daach voll bring könn.
In Winter warn die Boller diräggd addragdiv, wenn se schö braun und dambferd uffm Schnee gelääche sin un di viele Schbatze, wo´s bei uns gäwe had, die hammer nid füdder gemüßt, die sin vo unnere Gäul mid versorchd worn. Wenn se gfrore warn, hammer alz a damit gschmisse odder rum geroxd. In Sommer, wo mer wäß Godd wie ofd barfüsserd geloffe sin, da is mer öftersch e mal drüwer gschdolwerd.  Die Roßboller ham uns eichndli unner ganze Kindheid begleid. Alleweil sieht mer drauß in Wald un Fäld widder öfter so e Ansammlung vo denne braune Hawerglöß. Awer des is nid des „outfit“ vo denne vo früher, da fähld es „Lokalkolorit“. Neulich awer hawi in Dürrbach uffere gedeerte Straß so e schö grubbierds Häufele gsähe un e baar Schbatze ham da grad ihr Fästässe ghadd. Da hawi mi an di schönne Roßbollerzeid derinnerd un hab die Böllerli hald blos liebevoll aageguggd. Am liebste hädd i widder emal en gekiggd odder gar gschmisse. Awer da sin so viel Leud gewäse. Veleichd hädd mi enner gekennd.  Da häddi mi doch schenierd.
hf