Beim Wawersch Fritz

Kategorie: Beispielbeiträge
Veröffentlicht am Samstag, 05. August 2017 13:55
Geschrieben von Helmut Försch
Zugriffe: 3029

 

Beim Wabersch Fritz

 

Ein fränkisches Mundartgedicht aus der Mainschleife um Volkach

 

 

 

Beim Wabersch Fritz geits Kinnleskerm  - der Schtorch, där hat heut Nachts um eens,

 

Es fümpfezwanzichsd Kiend  - en fatze Buam gebracht.

 

Da därf mer werkli sach, hald ei mid sötta sachn Harr,

 

E Wunner, wenn där Fritz nid wird dadrü e Narr.

 

 

 

Er had sein Koupf gewaldi gsengt, wie er zun Pfarr nei it

 

E verdl Hunnerd es is was args, no i verdenks’n niet:

 

Had unnereens genuch zu tund mit zwä scho odder drei

 

Möchd Vadder nid für e Million vo fünmpfezwanzich nid sei.

 

Es is hald uugääch eigedääld, mer kann nix mach dadraa –

 

Un wie der Fritz zun Pfarr nei it – fengt där zun fröäche aa:

 

No, Wawersch Fritz , was bringd er näüs, er mechd e sauersch Gsicht –

 

Ke Wunner, brummd der Fritz, es is hald a ke söässe Gschicht.

 

 

 

No secht der Pfarr, derschreggd mi nit, red doch, wie sich’s gebührd,

 

Fassd äüch, setzt äüch ärschd un sachd, was is denn schlimms bassierd?

 

O wär i wo der Pfaffer wext, meinthalm in Russland hint,

 

Mei Fraa, die alde Schachdl had scho wider griechd e Kiend.

 

I meen i müssd nein Boudn sink, glei uff der Schdell dadurch –

 

Hochwürdn – es fünmpfezwanzichst is, dar Guggugg hol dan Schdorch.

 

E Dutznd warn mer grad genuch, es war mer debei nit Wouhl,

 

Jetz mechd mei Fraa, des Naast des ald, es verdlhunnerd voul.

 

I haa gedachd, die Kinnlesgschichd die lääched enndli brach,

 

Jetz kann ich widdwer Breili koch un Flagglesbatzer mach.

 

Un wenn i sou e Winnl saah, da wärd mersch hääß un kald,

 

Die senn, werkli, mei lääberschdaach, gepensld, nid gemald

 

Was hilfd mersch, wenn is ganze Haus,  voll Madli hab un Buam

 

So kann i uff kenn grüane Zwääch, zu nix wie Schuldn kumm.

 

Un lawi wie e Mönch im Wald, armseeli wie a Maus.

 

S  kost ölles Gald, un nach un nach, da geht der Zwirn hals aus.

 

Es ee brauch Housn, Schdrümbf un Schuh, es anner brauchd en Kamm,

 

Wenns alls Daach bloß öbbes is, es löbbert sich hald zamm.

 

En ganze Daach, häßts Vadder Gald, als waxets wie es Kraud,

 

Sündäüer ölls. I meen i müsst, als fahr aus meiner Haud.

 

Un dar Spektaggl in dan Haus, bei Dooch als wia bei der Nachd.

 

Was hlfd wersch, wenn i druffhau dass di Hinnerschwardn krachd.

 

Die klenn Knäüdl wölln nit folch, wöll, mi nid ästemier,

 

Die grosse Lümml ei die wölln en Löffl mi halbier.

 

 

 

No sechd der Pfarrer, när Geduld, nid immer glei verlorn,

 

S gehd alles sein beschdimmdn Waach, es wird so schlimm nid warn.

 

Dei Kinner, die sin alle gsund un griechd es Gald der Beck

 

Is besser, als zun Dokder künnts un nei der Apethek

 

Der Harrgodd is der alde no, beschard er heind en Hos,

 

Da kannst di sicher druff verlass, da geit er aa es Gros.

 

 

 

O bleit mer secht der Wabwesch Fritz mid södde Schbrüch vom Leib

 

Mei Kinner frassn öll ke Gros, nid emal zun Zeidverdreib.

 

Es gschichd mer awer rachd, hawi die Subbe eigebroggd,

 

Etz kann i zugugg wia a anner sie widder außischoggd.

 

Mei Fraa die alde Hosekuah, söll aa ihrn Dääl dra draach,

 

Denn bannerd träächd sich leichte no, sei Kreuz sei Leid sei Plaach,

 

Un bleiwi gsund un fühl mi no, so frisch allaard un woul,

 

Leit mer nix dra, wird mit der Zeid  es zwädd verdl Hunnerd voul.